ILOILO CITY — Ginapahalong sang City Health Office (CHO) ang mga Ilonggos sa pagtimbuok sang heat-related cases subong nga Mayo.
Suno kay Dr. Jennifer Castro sang CHO, 924 na ang heat-related cases sa siyudad sa sulod lang sang lima ka semana nga monitoring period. 355 sini ang na-record halin sang Abril 7 tubtob 30.
Ang pagtimbuok sa kaso na-record sa una nga semana sang Mayo nga yara sa 569.
Nagapanguna nga heat-related case ang 341 ka kaso sang upper respiratory tract infection. Ginsundan ini sang 155 ka kaso sang hypertension, 148 ka kaso sang skin disease, 105 ka kaso sang animal bites, kag 79 ka kaso sang pneumonia.
Ang pagtimbuok sa kaso ang gina-angut sa mataas nga heat indices nga masami yara sa Extreme Caution tubtob Danger levels. Pinakataas nga heat index na-record sang Mayo 10 sa 47 degrees Celsius.
Gina-remind ni Castro ang mga Ilonggos nga limitahan ang pagbulad sa adlaw ilabe na halin las-10 sa aga tubtob las-3 sa hapon. — Aksyon Marvin Malificiar
