ILOILO — Wala nakapa-enroll ang 22 anyos nga estudyante subong nga tuig tungod may subject siya nga wala napasaran.
Ini ang ginatudlo nga rason ni Police Captain Bonifacio Alabe, Jr., hepe sang Pavia Municipal Police Station sa paglumpat ni alyas Darren sa taytay sa Pavia kahapon.
Base sa pag-istorya ni PCaptain Alabe sa utod sang estudyante, incoming fourth year student na kuntani si Darren.
Dugang pa ni Alabe nga nakibot na lang ang iloy ni Darren sang nabaton ang impormasyon nga naglumpat ang iya bata sa taytay tungod naglisensiya pa siya nga makadto sa Iloilo City kahapon.
Wala man sang ideya ang iloy kon ngaa wala nakapa-enroll ang iya bata subong nga tuig.
Nakaagum sang bali sa paa kag pilas sa agtang si Darren.
Gin-operahan siya kagab-i sa Western Visayas Visayas Medical Center sa Mandurriao kag estable na ang kondisyon suno sa pulis. — ARI trainee Romel Lavilla
