ILOILO CITY — Dakup ang electrician sang nakuhaan sang P100,000 sang suspected shabu sa drug bust operation sa Barangay Kahirupan, City Proper kagab-i.
Suno kay Police Major Eduardo Siacon Jr., hepe sang Iloilo City Police Station 7 sa City Proper, ang subject nga si alyas Jeric, 36-anyos sang Salvacion Habog-habog, Molo nadakpan na sa kaso may kaangtanan sa illegal nga druga sang 2023 kag nakaguwa paagi sa plea bargaining agreement.
Ginpabutyag ni Siacon nga ginagamit sang subject ang iya motorsiklo sa pagdul-ong sang illegal nga druga sa iya mga parokyano.
Dugang ni Siacon, kon may service siya sa pagka-electrician, gina-ulayhon man niya ang pagbaligya sang illegal nga druga.
Na-recover sa operasyon ang siyam ka sachets sang suspected shabu nga ginabanta nagabug-at 20 gramos. — Aksyon Maria Kayla Tingzon
