ILOILO CITY – Ginreklamo sang senior citizen nga negosyante sa Calinog ang pulis nga naga-ranggo Police Corporal tungod sa wala mabayran nga utang nga P120,000.

Nagapautang ang tagreklamo kag nagabaton sang mga ginaprenda nga pagkabutang.

Suno sa tagreklamo, gintanyag sang pulis ang iya service firearm sang nagkadto sa ila balay sang Enero subong nga tuig.

Nagsalig ang negosyante kag kumpiyansa tungod pulis gani ginbaton niya ang pusil. Sang nakuha sang pulis ang kwarta, nagbalik siya makaligad ang tatlo ka adlaw kag nagpabutyag sa negosyante kon pwede makuha ang pusil tungod may inspection.

Nagpasugot man ang negosyante pero tubtob subong wala na nakabalik ang pulis kag wala mabayaran ang P120,000.

Makapila ka beses gintawgan sang negosyante ang pulis pero wala nagasabat. Nagpakilala ang pulis nga na-assign sa Iloilo Police Provincial Office sa Sta. Barbara gani ginkadtuan sang negosyante.

May nabaton pa gid nga impormasyon ang negosyante nga sa Dueñas Municipal Police Station naga-duty ang pulis pero sang ginkadtuan, natukiban nga nag-file sang leave kag wala pa makabalik.

Nagapanawagan ang negosyante sa pulis nga mag-contact sa iya kag bayran ang P120,000.

Bukas ang Aksyon Radyo Iloilo sa paathag sang ginareklamo nga pulis.