ILOILO — Ginhingagaw dala sa ospital ang lineman nga nakuryente sa Ungka 1, Pavia subong nga hapon.
Ginkilala ang biktima kay alyas Christian, 32-anyos, lineman sang contractor sang ILECO I.
Suno sa upod ni Christian nga si Toto, may gina-ilisan sa linya sang kuryente kag naka-off man ang feeder. May power interruption man nga ginpatuman kaina.
Bisan naka-off na ang feeder, posible nga may nabilin pa nga power sa linya gani nakuryente ang lineman, suno kay Toto.
Ginpabutyag pa ni Toto nga wala man nalipong si Christian kag may safety harness man. Pero may paso siya sa wala nga siko kag tuhod.
Ginrespondihan sang PAVERS ang lineman kag gindala sa ospital.
Sa subong, under observation ang lineman kag conscious na. — Aksyon Farrah Mae Morano
