ILOILO— Nagkinaran-karan ang mga pasahero sa Sara terminal sakop sang Brgy. Apologista sang ginbuno sang pasahero ang konduktor sang bus la-1 subong nga hapon.
Biktima si alyas Jet-jet nga taga-Brgy. Tabunan, Lemery samtang suspek si alyas Ron-ron nga taga-Brgy. Domingo, Sara.
Suno kay Lieutenant Brett Balopiños, hepe sang Sara Municipal Police Station, nagapanaug ang mga pasahero sang bus kag nagabulig ang konduktor.
Sa alegasyon sang suspek, samtang ginakungkong niya ang iya bata kag nagapanaug na sa bus, gulpi lang may nagtiklod sa iya. Nakita niya ang konduktor ang nakatiklod sa iya.
Tungod sini, naakig ang suspek, nagkuha sang kutsilyo kag ginbuno ang konduktor. Naka-inum sang makahulubog nga ilimnon ang suspek, suno sa pulis.
Napilasan ang konduktor sa wala nga butkon nga gindala sa ospital.
Nagdepensa naman ang biktima nga indi niya hungod nga maigo ang suspek kag nagpangayo pa sang pasaylo, suno sa pulis.
Nadakpan ang suspek kag preso na sa Sara Municipal Police Station. — Aksyon Farrah Mae Morano
