ILOILO — Laslas na ang puwak kag wala na sang duha ka tiil sang nasapwan ang karbaw sa Brgy Salngan, Passi City, kahapon sang aga.
Suno kay Police Senior Master Sergeant Gonzalo Plete, Jr., imbestigador sa Passi City Police Station, nakibot na lang ang tag-iya nga si alyas Angelo, 60-anyos, sang nabugtawan nga wala na ang karbaw nga ginlawig niya sa talamnan malapit sa ila balay.
Suno naman kay Aileen, asawa ni Angelo, gingamit ang karbaw sa pag-obra sa kampo kag ginhigot ini sa gintibsok nga kahoy ukon palpal sa talamnan.
Nasapwan sang mag-asawa nga gin-utod ang higot sang karbaw kag ginapatihan ginguyod ini pakadto sa bukid, ginabanta 100 metros ang kalayuon halin sa talamnan.
May mga igo sang pagkatiro sa ulo ang karbaw suno sa tag-iya.
Sa pagpangusisa sang mga pulis, nakabati sang lima ka lupok ang mga residente sang gab-i antes nasapwan ang karbaw, pero wala nila ginsapak.
Padayon nga gina-imbestigaran sang kapulisan kon sin-o ang nagpatay sa karbaw.
