ILOILO— Illegal nga druga ang mayor nga negosyo sang subject sa drug buy bust operation sa Zone 3A, Brgy. Lanit, Jaro kaina sang hapon kag indi mga assorted goods sa iya nga sari-sari store.
Ini suno kay Captain Roque Gimeno III, head sang City Drug Enforcement Unit (CDEU).
Subject sang operasyon si alyas Banjie, 50-anyos nga residente sang amo man nga lugar.
“Sari-sari store owner [ang nadakpan]. Gamay man lang nga store nga may mga kompetinsya man sa palibot. Ang main niya nga negosyo pagbaligya sang illegal nga druga. Base sa impormasyon nga ang illegal drugs didto niya ginabutang sa tiyangge niya,” suno kay Gimeno.
Sa impormasyon suno sa pulis, sang nadakpan sa drug buy bust operation ang duha ka bata sang subject sang 2025, siya na ang nagbulos sa illegal nga aktibidad.
Kaina, nakuhaan sang 140 grams sang suspected shabu nga nagabalor sang P952, 000 ang subject.
Lima ka sachets kag duha ka knot tied sachets sang suspected shabu ang na-recover sang kapulisan. — Aksyon Farrah Mae Morano
