Napatay samtang ginabulong sa ospital ang driver sang motorsiklo sang nakabunggo sa Toyota pickup sa Brgy. Bita-og, Santa Barbara las 7:10 kagab-i.
Suno kay Police Captain Raphy Señeres, Officer-in-charge sang Sta. Barbara Municipal Police Station halin sa Sta. Barbara ang driver sang motorsiklo nga si alyas James, 35, kag papuli na sa Brgy. Agmanaphao, Mina.
Pag-abot sa intersection sang access road nga sakup sang Brgy. Bita-og, wala nadiparahan sang biktima ang nagapadulong nga Toyota pickup nga ginamaneho ni alyas Bert, 60, sang Brgy. San Jose, San Miguel tungod madulom ang lugar.
Na-damage ang bumper sang Toyota, samtang nakaagum naman sang pilas sa ulo, lawas kag tiil ang driver sang motorsiklo
Gindala sa Pototan Provincial Hospital ang driver sang motorsiklo kag gin-refer man sa Western Visayas Medical Center, pero gindeklarar nga napatay pasado las 12 kaina sang kaagahon.
Yara subong sa kustodiya sang Sta. Barbara Police ang driver sang Toyota kag ginahulat ang desisyon sang pamilya sang biktima kon mapasaka sang kaso ukon mapa-areglo suno kay Police Captain Señeres.
