ILOILO CITY — Naka-custody na sa Police Station 7 ang 29-anyos nga Police Patrolman nga ginreklamo sa tuyo nga pagpanghimulos sa empleyada sang pension house sa City Proper.
Suno kay Police Major Eduardo Siacon, hepe sang Police Station 7 sa City Proper, pasado las-3 kahapon sang hapon, Hunyo 10 sang nagreklamo sa ila ang empleyada sa tuyo nga pagpanghimulos sang pulis sa iya.
Ang tagreklamo, amo ang nag-assist sa police patrolman nga nag-check in tungod may aktibidad nga kadtuan sa Police Regional Office 6.
Assigned sa Regional Mobile Force Battalion (RMFB) ang pulis sa iban nga banwa gani nag-check in sa pension house tungod wala siya sang may natineran sa Iloilo City.
Taga-Mindanao ang pulis nga na-assign lang sa RMFB sakop sang PRO 6.
Sa panaysayon sang tagreklamo naga-mop siya sang salog sang kwarto sang may ginhimo sa iya nga “indi insakto” ang pulis. Wala gindetalye kon ano ang “indi insakto” nga ginhimo sang pulis.
Tungod sini, naglisensya ang tagreklamo nga maguwa siya kay may kuhaon.
Ini ang rason nga nakapanugid siya sa iya mga upod kag sa iya live-in-partner, kag naka-report sa mga pulis.
Wala makahibo ang Patrolman nga naka-report na sa Police Station 7 ang tagreklamo gani naabtan siya sa iya kwarto kag gin-aresto.
Samtang, sa ginpaguwa nga statement ni Police Regional Office 6, Acting Regional Director Police Brigadier General Randulf Tuaño, wala nila ginatolerar ang ginhimo sang patrolman.
Ginpasalig niya man nga magahimo sila sang imbestigasyon para sa nagakaigo nga penalidad sa nasambit nga pulis. — Aksyon Angel Mae Ciudad
