ILOILO— Pilason ang nagakatulog nga biktima sang gintiro sang iya upod sa trabaho sa Brgy Balabag, Pavia kaina sang aga.
Ginkilala ang biktima kay alyas Widson, 30-anyos sang Brgy. Patong-patong, Janiuay; samtang ang suspek si alyas Joen, 20-anyos sang Miagao, Iloilo.
Upod ang duha nga manugluto sa kalan-an sa Balabag, Pavia sang tatlo na ka tuig.
Suno kay Police Major Bonifacio Alabe Jr, hepe sang Pavia Municipal Police Station, may daan na nga hiligut-anon ang duha tungod nag-away sila pero gin-settle sang ila nga amo.
Sa imbestigasyon, nag-inom-inum ang duha kagab-i kag liwat nga nag-inaway.
Kaina naman sang aga, nagpangayo sang pasensya ang suspek sa biktima. Pero imbes nga patawaron, ginhangkat sang biktima ang suspek nga mag-boxing pero wala siya nagbato.
Nagpauli sa Miagao ang suspek kag nagkuha sang armas, suno sa pulis. Pagbalik niya sa Pavia, ginpangita niya ang biktima kag na-abutan nga nagakatulog.
Gintiro sang suspek ang biktima sang tatlo ka beses nga naigo sa ulo.
Nadakpan naman ang suspek kag na-recover ang 38 caliber revolver. — Aksyon Farrah Mae Morano
