ILOILO CITY — Napilasan sa guya ang 17-anyos nga pintor sang ginbuno sang buka nga botelya sang 16-anyos nga estudyante sa Barangay Danao, City Proper las-11 kaina sang aga.
Suno kay Police Captain Melchor Tolentino, officer-in-charge sang Iloilo City Police Station 1, samtang nagapanaog halin sa third floor sang building sa diin nagatrabaho ang biktima nga si alyas Toto, ginbantayan na siya sa idalom sang suspect nga si alyas Nonoy.
Ginkuha sang suspect ang botelya sa sulod sang iya nga bag, ginbuka kag ginbuno ang biktima sa guya.
Nagpalagyo ang suspect kag padayon nga ginapangita sang kapulisan.
Suno sa police, daan nga hiligut-anon ang motibo sa krimen tungod nahibaluan nga gintiro sadto sang biktima ang suspect pero wala siya na-igo sa Molo.
Padayon nga ginabulong sa ospital ang biktima, samtang nagkoordinar na ang pulis sa ginikanan sang suspect agud mapa-surrender siya. — Aksyon Maria Kayla Tingzon
