ILOILO CITY — Dead-on-arrival ang 57-anyos nga electrician sang gintiro sa Brgy. Airport, Mandurriao pasado las-11 kagab-i, Hunyo 19.
Ginkilala ang biktima kay Alyas Norman, 57-anyos nga electrician; samtang suspek si alyas Benben, 50-anyos nga construction worker kag lunsay residente sang amo man nga lugar.
Suno kay Barangay Kagawad Ramon Ferrer, nakaagi na away ang suspek kag ang biktima.
Sa matandaan ni Ferrer, ginlabo sadto sang suspek ang biktima pero na-settle na ang amo nga kaso.
Kagab-i, nagguwa sa highway ang biktima upod ang iya nga asawa kag nagsugataay sila sang suspek, suno kay Ferrer.
Nagbugnuhanay lang ang suspek kag biktima kag nagluntad ang pagpangtiro, suno kay Ferrer.
Suno kay Captain Lester Oliveros, hepe sang Police Station 10 sa Mandurriao, gindakop sang kapulisan ang suspek makaligad ang pila ka oras nga pagbantay sa guwa sang iya balay.
Ginpahayag ni Oliveros nga halin pasado las-11 kagab-i tubtob kaina sang kaagahon, gin-negosyar sang pulis ang suspect nga mag-surrender pero wala nagkooperar.
Nag-ayo pa ang suspek nga matulog kag las-7 sa aga lang ma-surrender.
Samtang nagahulat ang pulis, nagpinalupok ang suspect gani napilitan ang taga-SWAT nga sudlon na lang sa iya nga balay.
Gindala sa ospital ang suspect sang napilasan. Las-6 sang aga, nag-abot ang Scene of the Crime Operatives ukon SOCO sa crime scene agud mag-conduct sang dugang nga imbestigasyon.
MAY NERVOUS BREAKDOWN
Nagasuprer sang nervous breakdown ang suspek sa pagpangtiro sa Old Airport, Mandurriao.
Ginkumpirmar ni Punong Barangay Benjie Macailing nga nagakagutman sadto ang suspek nga si alyas Benben.
Ini man ang rason nga ginlabo sang suspek ang bata nga residente sang barangay sang 2001 kag napreso sang isa ka tuig.
Gin-diagnose nga may nervous breakdown si Benben kag may maintenance nga bulong.
Tungod sa pagkahangawa, nag-request ang barangay sa pamilya ni Benben nga papulion siya sa Mindoro, pero nagbalik siya sa Iloilo City sang 2022.
Sa amo man nga tuig, ginlabo man sang suspek sang binangon ang biktima pero wala naigo tungod nakasangit sa atop sang balay nga human sa kawayan. — Aksyon Farrah Mae Morano/trainee Romel Lavilla
