Bodegero sang mga nadakpan sa drug bust operation sa Oton, nadakpan sa operasyon sa Molo; P4.7 million nga balor sang shabu na-recover

ILOILO— Wala na nalab-utan sang Fiesta sa Molo kag nadakpan ang bodegero sang shabu sa drug buy bust operation sa Zone 3, Brgy. Calumpang, Molo.

Subject si Alyas Parcon, 26-anyos nga residente sang amo man nga barangay.

Suno kay Police Captain Ryan Christ Inot, hepe sang Police Station 4 sa Molo, nagapreparar pa kuntani si Parcon tungod para sa fiesta sa Brgy. San Juan kag sa distrito sang Molo ang supply sang illegal nga druga.

Ginpabutyag ni Inot nga isa si Parcon sa mga bodegero sang shabu sang mga nadakpan sa drug buy bust operation sa Oton nga nakuhaan sang P13.4 million.

Antes nadakpan ang mga subject sa operasyon sa Block 20, Lot 3, Florvel Subdivision, Barangay Buray, Oton, nakapadala na sila sang supply sang shabu kay Parcon nga para kuntani sa Fiesta.

Sa operasyon sang Station Drug Enforcement Team (SDET) na-recover ang 700 grams sang suspected shabu nga may standard drug price nga P4.7 million. — Aksyon Farrah Mae Morano