ILOILO — Patay ang call center agent kag delivery boy sang natiruhan sa namatyan sa Barangay Quinaspan, Alimodian.
Ang mga biktima amo kanday Alyas Ariel, 41-anyos nga call center agent kag Alyas Francis nga delivery boy.
Suno kay Police Captain Chrysler John Ledesma, officer-in-charge sang Alimodian Municipal Police Station, nagbaisay si alyas Ariel kag suspect nga si alyas Banban samtang nagasugal.
Hinali lang nga naggabot sang pusil si Banban kag nagpinalupok gani na-igo si Ariel. Nasalabat naman si alyas Francis.
Naigo sa wala nga kamot, wala nga dughan, kag tiyan si Ariel. Napilasan naman sa tuo nga porsyon sang iya tiyan si Francis.
Ginbulong pa ang duha ka mga biktima sa separado nga mga ospital sa Iloilo City pero napatay.
Nagapabilin nga at-large ang suspect kag nagapadayon pa ang hot pursuit operation batok sa iya. — Aksyon Maria Kayla Tingzon
