ILOILO — Arestado si Punong Barangay Dodjie Allesa sang Barangay Bulod, Alimodian sang ginserbehan sang search warrant tungod sa indi lisensiyado nga pusil.
Suno kay Police Captain John Paul Hernandez, Officer-in-Charge sang 601st Maneuver Company sang Regional Mobile Force Battalion 6 nga naka-base sa Alimodian, may mga nagpalab-ot sa ila sang reklamo nga nagapinalupok si Allesa.
Tungod sini, gin-validate ang reklamo sang concerned citizen.
Naglab-ot sa isa ka bulan ang monitoring tubtob nagguwa ang search warrant batuk sa punong barangay.
Na-recover kay Allesa ang isa ka caliber 45, tatlo ka magazines nga loaded sang pito ka bala kag 12 pa ka bala nga nasulod sa “pouch.”
Suno kay Hernandez, nagapati si Allesa nga politika ang rason sang nag-reklamo sa iya tungod malapit na ang eleksyon.
Ginpaathag man sang punong barangay nga maproseso na siya kuntani sang mga papeles para magkuha sang lisensiya, suno sa pulis.
Ang ini nga operasyon suno kay Hernandez ang parte sa mas ginapasangkad nga kampanya sang Police Regional Office 6 batuk sa illegal possession of firearms.
