ILOILO — Nagatrabaho sa poultry farm ang 15-anyos nga solterito nga nasapwan patay sa Barangay Balud Lilo-an, Zarraga kaina sang aga, kag wala na makapauli kagab-i.
Suno sa amay sang solterito nga si alyas Niko, 15-anyos, halin sang Huwebes pa naga-obra sa poultry farm ang iya bata tungod half-day lang ang ila klase.
Las-12 sa udto ukon las-6 sang hapon nagapadulong sa poultry farm ang solterito tungod gab-i ang pag-harvest sang mga itlog.
Upod sang solterito nga naga-obra sa poultry farm ang classmate niya nga naga-edad 14, kag ang 15 kag 16-anyos nila nga schoolmates.
Suno sa mga upod sang solterito, nag-inom-inom sila mga las-8 kagab-i kag las-10 sang nagdesisyon nga magpauli.
Idul-ong pa kuntani pauli ang solterito sang iya mga upod pero nagpamalibad na siya.
Nasapwan na lang las-6:30 kaina sang aga ang solterito sang may nakalabay nga residente.
Sang ginproseso sang SOCO ang bangkay, wala sang nakita nga pilas sang pagkalabo, buno ukon tiro ang solterito.
May nakita naman nga pagsulong sang dugo sa likod kag tiil sang solterito. May mga gasgas man siya sa tuhod kag tudlo sa kamot.
