ILOILO CITY — Ginpamulta sang P10,000 ang Iloilo City Government tungod sa dump truck nga nakuhaan sang video nga wala sang plate number, wala sang official seal kag defective ang brake lights.
Gin-aprubahan ni Land Transportation Office Region VI Director Atty. Gaudioso P. Geduspan II, ang resolution nga ginpresentar sang LTO-6 Intelligence and Investigation Unit sa multa nga P10,000 tungod sa mga gin-violate nga pagsulundan.
Suno kay Geduspan, gina-ekspektar nila nga ang mga salakyan sang gobyerno ang magsunod sa “same basic requirements imposed on ordinary motorists.”
PAGPA-ATHAG SANG CITY GOVERNMENT
Suno kay General Services Office Chief Engr. Neil G. Ravena, nadula ang plate number sang amo nga truck sang Hulyo 2, 2026 sa Brgy. Calahunan, Mandurriao.
Gingamit ang truck sa pagkuha sang mga debris nga naglinapta sa dalan tungod sa sunog sa Muelle Loney.
Wala na sang iban nga truck nga bakante sa amo nga tion rason nga ila gingamit sa pagpanghakot ang amo nga truck, dugang pa ni Ravena.
