ILOILO CITY — Na-recover ang suspected dried marijuana, high grade marijuana leaves ukon kush kag liquid marijuana sa drug buy bust operation sa Brgy. San Pedro, Molo.
Suno kay Police Captain Ryan Christ Inot, hepe sang Police Station 4 sa Molo, na-monitor ang illegal nga aktibidad sang subject nga si alyas Boss, 21-anyos nga residente sang Brgy. Yulo Drive, Arevalo gani gin-operate nila.
Lakip sa na-recover sa subject ang 80 grams sang suspected dried marijuana leaves nga nagabalor sang P9,600; 5 grams sang high grade marijuana nga nagabalor sang P7,500; kag vape nga may liquid marijuana nga ginabanta nagabalor sang P10,200.
Sa impormasyon sang pulis, madamo sang kilala si Boss kag sa bilog nga syudad sang Iloilo nagabaligya ilabe na sa ila “trusted customer.”
Nagadul-ong man siya sang marijuana sa probinsya sang Iloilo tungod may service nga motorsiklo.
May kaupod ang subject sa pagbaligya sang marijuana ilabe na ang liquid marijuana nga uso na subong, suno sa pulis.
Gina-“my day” naman sa social media sang subject ang liquid marijuana sa vape agud mabaligya.
Sa Manila niya ginakuha ang supply sang marijuana, suno sa pulis.
