“Bodegero” sang shabu nadakpan sa drug buy bust operation sa Balasan; ₱2.3 million nga balor sang illegal drugs na-recover

ILOILO— Liwat nga may nakuha nga minilyon nga balor sang suspected shabu sa drug buy bust operation sa fifth district sa probinsya sang Iloilo.

Nadakpan sa operasyon sa Brgy. Pani-an, Balasan si alyas Dodoy, 45-anyos nga residente sang Purok 1, Brgy. Malbog, Estancia.

Na-recover ang 340 grams sang suspected shabu nga may standard drug price nga ₱2.3 million.

Suno kay Lieutenant Patrick John Alabado, hepe sang Balasan Municipal Police Station, bodegero sang illegal nga druga ang subject kag gina-distribute niya sa Quinto Distrito.

Indi naman konektado ang subject sa nadakpan sa drug buy bust operation sa Estancia kahapon nga nakuhaan man sang P2.8 million nga balor sang shabu.