7 ka tuig nga bata patay sang nalumos sa suba sa Passi City

ILOILO – Patay ang pito ka tuig nga bata nga babaye sang nalumos sa suba sa Brgy. Dalicanan, Passi City kagab-i.

Residente sang Brgy. Gemumua ang bata.

Suno kay Brgy.Kagawad Harold Gabais sang Brgy Gemumua, nagpauli sa ila balay halin sa eskwelahan ang bata kag ginsugo sang iya iloy nga mag-ilis.

Wala nakahibalo ang iloy nga ginpangita sang bata ang iya lola sa Sitio Tak-on. Ginpangita sang iloy ang iya bata kag nakit-an ang jacket kag pungos sa kilid sang suba nga alagyan pakadto sa Sitio Tak-on.

Nagdugay sang apat ka oras ang pagpangita sa bata tubtob nasapwan ang iya lawas tunga sa kilometro ang kalayuon halin sa kon diin nakit-an ang iya jacket kag pungos.

Posible nga nagtabok sa suba ang bata pero tungod sa mabaskog nga daludo sang tubig makaligad ang pag-ulan, gin-anod siya.

Ginhingagaw sa ospital ang bata pero gindeklarar nga patay.