2 ka fishing boats nga illegal nagapangisda sa baybayon sakop sang Concepcion ,Iloilo arestado sang Iloilo Provincial Bantay Dagat Task Force

ILOILO – Siyam tanan nga mga mangingisda ang naaresto sang Iloilo Provincial Bantay Dagat Task Force sang nadakpan ang duha ka mga fishing boats sang illegal nga nagapangisda sa baybayon sakop sang Brgy. Malangabang, Concepcion kaina sang kaagahon.

Lunsay taga-Victorias City, Negros Occidental ang mga arestado.

Nagabalor sang P300,000 ang kada fishing boat nga nakumpiskar sang mga otoridad kag trawling equipment nga nagabalor sang P100,000 kag mga nahulik nga isda sa balor nga P10,000.

Sa kustodiya sang Concepcion Municipal Police Station ang duha ka mga kapitan samtang gin-release ang pito ka mga crew members.

Mas ginpasangkad ang seaborne patrol sang mga otoridad sa kadagatan sa probinsiya sang Iloilo sa kawsa nga maamligan ang mga marine resources.