ILOILO – Nag-ako ang Grade 7 student sa Luca National High School sa Ajuy nga siya ang nag-post sang pamahog sa Facebook nga nagtuga sang kaalarma sa mga estudyante, manunudlo, kag komunidad.
Sang Oktubre 13 sang gab-i, nabasahan ang post sa Facebook nga ginapahalong ang mga estudyante tungod may mabun-an sa eskwelahan.
Sa pihak sini, wala ginsuspender ang klase kaina sang aga kag hugot nga ginpatuman ang screening sa bag sang mga estudyante nga nagasulod sa eskwelahan.
Suno kay Police Captain Aileen Lacrite, hepe sang Ajuy Municipal Police Station, posible nga ginkulbaan ang 12-anyos nga estudyante tungod gin-id-idan sang kapulisan ang pag-imbestigar.
Una nga nag-aku ang estudyante sa iya adviser nga siya ang naghimo sang pamahog gani gin-report sa mga otoridad. Ginpatawag man ang ginikanan sang estudyante.
Nagrason ang estudyante, suno kay Lacrite, nga “gin-testingan” niya lang ini kag wala siya nagdumdom nga ma-post ang pamahog tungod wala siya sang load. Dugang pa sang estudyante nga nakibot na lang siya sang naglapta na ang iya post pagka-aga.
Sang gin-check ang Facebook account, nahibaluan nga kagab-i lang man ini ginhimo.
Tungod sini, ipaidalom sa Psychosocial intervention ang bata, nga nagpahayag nga tuman man ang iya paghinulsol.
Nagpangayo man sang pasaylo ang iloy sang bata tungod sa huol nga natuga.
