Nagguwa sa 2025 report sang Commission on Audit nga may 16 ka mga proyekto sa probinsya sang Iloilo nga wala ma-implementar sa idalom sang Barangay Development Program (BDP) sang National Task Force to End Local Communist Armed Conflict (NTF-ELCAC).
Ini ang ginpabutyag sa press release sang Bayan Panay sa diin gintumod sang grupo nga 10 sa mga proyekto ang nahamtang sa Tubungan, apat sa Leon kag duha sa Igbaras. Magluwas sini, 13 pa ka mga proyekto sa idalom sang NTF-ELCAC BDP ang wala nakumpleto sa pagtakop sang 2025.
Ang mga unfinished projects, subong man ghost projects ang ginpondohan halin sang 2021.
Gintumod sang Bayan Panay ang report sang Daily Guardian sang 2021, nga nakabaton ang Iloilo Provincial Government sang ₱720 million sang NTF-ELCAC BDP funding para sa 165 ka mga proyekto. Pero, ₱214.5 million lang ang nagasto sang local government unit (LGU).
Bisan nagpaguwa na ang LGU sang minilyon ka pesos para sa funding gaps, pila gihapon ka mga proyekto ang wala na-implementar ukon wala nakumpleto.
