ILOILO — Nagpadulong sa Headquarters sang 61st Infantry Battalion ukon 61IB, sa Camp Monteclaro, Barangay Igtuba, Miagao, ang 47-anyos nga anay miembro sang Southern Panay Front (D), Komiteng Rehiyon-Panay agud mag-surrender.
Si alyas Dandan ang halin sa Leon kag nagserbe nga Finance and Logistics Officer (FLO) sang na-dismantle na nga Puregold Platoon, Southern Panay Front, Komiteng Rehiyon-Panay.
Gindala ni Dandan sa iya pag-surrender ang isa ka (1) Akkar Charles Daly 12-gauge shotgun kag tatlo ka live cartridges.
Magluwas sini, gintudlo man ni Dandan ang lokasyon nga ginataguan sang ila mga gamit.
Naka-recover sa Barangay Bucari, Leon, ang mga masunod nga gamit: ang 45 ka magazines sang M16 rifles; isa ka Type C anti-personnel mine (IED); isa ka detonator; duha ka backpacks nga may mga unod sang nagkalain-lain nga gamit.
Sa subong, yara si Dandan sa custody sang 61IB samtang ginaplastar ang mga lihok agud mabuligan siya sa iya pagbag-o.
