ILOILO— Makaduha na ka beses nga nadakpan sa drug buy bust operation sang Provincial Drug Enforcement Unit (PDEU) si alyas Che-che nga subject sa drug buy bust operation sa Brgy Barasan, Pototan.
Suno kay PDEU head Major Dadje Delima, gindakop man nila sang nagligad nga tuig si Che-che pero nakabaton sila sang impormasyon nga liwat nga nag-engage sa illegal drugs.
Tatlo ka semana nga gin-monitor sang pulis ang aktibidad sang subject tubtob nga nadakpan sa drug bust operation kag na-recover ang 155 grams sang suspected shabu nga nagabalor sang P1,054,000 kagab-i.
Ginatungtong ukon ginabilin lang sang subject ang illegal drugs para kuhaon sang iya mga parokyano.
May ginpang-mention naman nga ngalan ang subject nga mga naga-engage sa illegal drugs sa ila nga lugar kag gina-validate na sang pulis.
Magluwas kay Che-che, 42-anyos, nadakpan man si alyas Stephen, 23-anyos nga residente sang amo man nga lugar.
Ang duha amo ang naga-distribute sang illegal drugs sa Pototan kag Dingle.
