ILOILO—Ginapreparahan na sang Provincial Hospital Management Office (PHMO) ang ‘patient influx’ ukon pagdagsa sang mga pasyente tungod sa epekto sang ‘very strong’ El Niño.
Ini suno kay Dr. Don Gonzales Garcia sang PHMO, nga isa sa nagpadulong sa Disaster Risk Reduction and Management Committee meeting sang Oktubre 22.
Ginatan-aw sang PHMO nga masaka sang 50 porsyento ang kadamuon sang mga pasyente sa 13 ka district hospitals sa probinsya sang Iloilo, tungod sa tuman kainit nga rason sang mga heat-related illnesses.
Dugang pa niya, indi dapat magkumpiyansa kag kinahanglan ang pagpangaman kontra sa mga balatian sa amo nga tyempo.
Ginpahayag sang PHMO nga kalabanan sa mga district hospitals sa probinsya, 100 porsyento na ang bed capacity consumption, gani nagbakal na ang PHMO sang mga extra folding beds kag gindugangan ang pag-procure sang tanan nga klase sang bulong.
Bilang pagpanghanda, nagdugang sa pag-procure ang PHMO sang water testing kits, extra containers para sa ginapaabot water storage sa mga district hospitals, airconditioners, kag emergency hiring sang healthcare workers sa mga district hospitals.
