ILOILO — Isa si Angelito Tobinasa, 35, sang Barangay Osorio 2, San Remigio, Antique, sa mga napatay sa pagpangtiro sa kapiyestahan sa Brgy. Sto. Rosario-Duran, City Proper kaina sang kaagahon.
Nagatrabaho bilang construction worker si Tobinasa sa Casa de España sa City Proper kag naga-board lang sa Sto. Rosario-Duran.
Base sa impormasyon, gintiro ni Anthony Sta. Lucia, 36, ang kasimaryo nga si Conrad Gabo, 36. Naga-inum-inom kanday Gabo kaupod ang iya mga abyan sang natabo ang pagpangtiro.
Wala sang komosyon nga natabo antes gintiro ni Sta. Lucia si Gabo. Si Gabo may igu sa likod kag ulo nga gintuna-an sang iya kamatayon.
Sang natabo ang pagpangtiro, malapit sa ginluntaran sang krimen si Tobinasa nga nagabakal lang sang fish ball.
May igu sa ilok si Tobinasa sang nasalabat sang bala. Gindala pa kanday Tobinasa kag Gabo sa ospital pero lunsay nga napatay.
Napahibalo na ang pamilya ni Tobinasa sa Antique sa natabo sa ila himata.
