ILOILO CITY -Gin-order lang online ang mga pulbura sang palupok kag gin-mikskla sang 15-anyos nga solterito tubtob nga nagsigabong kag nagresulta sa pagka-utod sang iya tuo nga kamot sa Brgy. Magsaysay, La Paz kahapon.

Suno sa tiyo nga si alyas Patrick, nag-order online ang iya hinablos tungod malapit na ang Disyembre kag may palukpon siya pag-abot sang New Year.

Sang nag-abot ang parcel, may instruction kon paano i-mix kag putson ang palupok gani posible nga ginmatu-matuhan sang iya hinablos sa sulod sang kwarto tubtub nagsigabong.

Nagapati ang tiyo nga wala man sang ideya ang hinablos nga may posibilidad nga maglupok ang mga pulbura gani kumpiyansa siya nga ibutang ini sa plastic bottle kag gin-mix.

Na-operahan na ang biktima kag wala gid nabalik ang nautod niya nga kamot suno sa tiyo.

Nagpasalig naman suno sa iya ang kapulisan nga i-trace ang baligyaan nga ginbaklan sang iya hinablos sa online para mapa-untat kag wala na sang may mahalitan.