AKLAN — Naka-record sang labing una nga kaso sang African Swine Fever (ASF) ang Aklan, suno kay Governor Jose Enrique Miraflores.
Sa Facebook post sang Aklan Information and Media Affairs Division, na-record ang kaso sang ASF sa Arcangel Sur, Balete.
Ginpasiguro sang gobernador nga nagatinguha ang probinsiya agud matapna ang paglapta sang ASF kag indi na maglaton sa kaiping nga banwa.
Padayon ang apelasyon sang probinsiya sa mga residente nga magkooperar sa ginapatuman nga biosecurity measures sa tuyo nga maproteksyonan ang swine industry.
Base sa data sang Department of Agriculture (DA) 6, Antique kag Negros Occidental na lang sa Western Visayas ang nagapabilin nga hilway sa ASF.
Una na nga gin-report nga may na-record nga ASF cases sa Iloilo, Guimaras, kag Capiz.
