ILOILO CITY — Nagdaug ang Aksyon Radyo Iloilo nga “Most Inspiring Healthcare Story for Radio” sa Paglaum TMC Iloilo Media Excellence Awards 2025.
May tig-ulo ang feature story nga “‘Lord, Buligi Ko Nga Mag-ayo, Pigado Pa Ang Pamilya Ko — Maestro sa New Lucena Nga Gin-diagnose Nga May Rare Neurological Disorder.”
Ang istorya may kaangtanan sa maestro nga taga-New Lucena nga gin-diagnose kag padayon nga nagapakigbatu sa X-linked Dystonia Parkinsonism (XDP). Nagdaku siya sa kapigaduhon pero wala ini nakapugong nga makatapos siya sa pag-eskwela kag nakatrabaho pero sang ulihi nagbalatian nga naghangkat sa iya ikaayong lawas.
Gin-feature ang istorya sa Public View program nga gina-host nanday Aksyon Ariel Solacito kag Aksyon Farrah Mae Morano.
Magluwas diri, ginpasidunggan man ang Aksyon Radyo Iloilo kag iban nga media organizations sa Iloilo bilang partner sang The Medical City – Iloilo ilabe na sa pagbalita may kaangtanan sa healthcare. — Aksyon Lhey Ann Alayon
