Pilas sa dughan ang ginkapatay sang amay sang ginbuno sang 21 ka beses sang live-in partner sang iya bata sa Barangay Sto. Niño, San Miguel kahapon sang kaagahon, Sept. 10.
Suno kay Police Senior Master Sergeant Ricardo Santuyo, imbestigador sang San Miguel Municipal Police Station, una nga nag-inom-inom ang biktima nga si Albert, 47 anyos, kag suspek nga si Chris, 38 anyos, sa balay sang biktima.
Nagpauli ang suspek, pero nagbalik agud sugaton ang bata sang iya live-in partner.
Ginpabutyag sang police nga maayo man ang pagpanawag ni Chris sang nagbalik, base sa ila pagpangusisa. Pero sang nakasulod na sa balay, nagdiretso ang suspek sa kuwarto sang biktima kag ginbuno sya sang makapila ka beses.
Nagpangayo ang asawa sang biktima sang bulig sa pihak balay agud matawgan sang ambulansiya kag madala ang iya bana sa ospital.
Nagpalagyo ang suspek dala ang kutsilyo nga iya gingamit sa krimen.
Sa pagpangusisa sang police, may mga tion nga nagadisgustuhanay ang suspek kag biktima. Pero wala pa gid matumod ang motibo ni Chris.
Nagapabilin nga at-large ang suspect. — Aksyon Maria Kayla Tingzon
