ILOILO CITY — Napatay samtang ginabulong sa ospital ang amay nga ginbuno sang iya bata sa Barangay Taft North, Mandurriao kagab-i, Oktubre 7.

Suno kay Police Lieutenant Greg Matutino, deputy chief of police sang Iloilo City Police Station 10, nag-away ang 40-anyos nga biktima kag iya live-in-partner kag natampa niya ang babaye. Nakita ini sang suspek gani ginsaway niya ang iya amay.

Na-impito ang 22-anyos nga bata tungod kaina sang hapon gin-akigan siya sang iya amay tungod sa ilimnon kag sigarilyo lang nagakadto ang iya kinitaan bilang construction worker.

May komosyon nga nagluntad sa mag-amay tubtob nagkuha sang kutsilyo ang bata kag ginbuno ang iya amay nga napilasan sa wala nga porsyon sang iya dughan.

Nagapabilin nga at large ang suspetsado. — Aksyon Maria Kayla Tingzon