Amay patay sang ginlampusan sang kawayan sang iya bata sa Badiangan; bata una nga ginlampusan sang baston sang amay – police

ILOILO – Presu sa Badiangan Municipal Police Station ang bata nga naglampos sang kawayan sa iya amay sa Brgy. Sianon, Badiangan kahapon, Oktubre 12.

Suno kay Police Major Jorge Lenantud, hepe sang Badiangan MPS, nagpadulong ang amay nga si Jimmy, 69, sa balay sang iya bata nga si Randy, 40, agud kuntani magsugo nga sakaan siya sang lubi.

Nagpamalibad si Randy kag nagrason nga kapoy siya sa mga ulubrahon sa talamnan.

Naakig ang amay kag ginlampusan sang baston ang iya bata.

Nagdepensa ang suspect, suno kay Lenantud, nga nagpalanulom ang iya panulok gani nagkuha sang kawayan kag ginlampusan ang iya amay sang makapila ka beses.

Gindala pa sa ospital ang biktima pero napatay.

Tuman naman ang paghinulsol sang bata sa natabo.

Sa pagpangusisa sang Badiangan police, may yara sang indi pag-intiendihanay sa tunga sang mag-amay. Ginpahayag sang police nga ginasakit sang amay ang iya bata kon maka-inom siya sang makahulubog nga ilimnon.

Pasakaan sang kaso nga Parricide ang suspect.