Angkas patay sang nakabunggo ang motorsiklo sa puno sang bayabas sa Santa Barbara

ILOILO — Patay ang angkas sang nakabunggo ang motorsiklo sa puno sang bayabas sa Brgy. Poblacion, Sta. Barbara kagab-i, Oktubre 12.

Suno kay Police Captain Raphy Señeres, officer-in-charge sang Sta. Barbara Municipal Police Station, halin sa Brgy. San Sebastian ang motorsiklo kag papuli na sa Brgy. Guno sang nadulaan sang kontrol sa manibela ang driver.

Tungod sini, nakasagaid sa gutter ang motorsiklo kag nakabunggo sa puno sang bayabas.

Gindala sa ospital ang driver nga nakaagum sang minor injuries kag estable na ang kondisyon sa ospital samtang dead-on-arrival ang angkas.

Ginpahayag sang police nga madasig ang pagpadalagan sang driver sang motorsiklo. — Aksyon Paula Elambayo