ANTIQUE – May kaso na sang African Swine Fever (ASF) ang Antique, suno sa Department of Agriculture (DA) 6.

Ginkumpirmar sang DA 6 nga nagpositibo sa ASF ang pila ka mga blood samples nga ginkuha sa mga nagkalamatay nga mga baboy sa Hamtic, base sa sulat nga ginpadala nila kay Governor Rhodora Cadiao.

Ginpadala sang DA 6 ang resulta sa local government unit (LGU) agud gilayon nga makahimo sang aksyon nga malikawan ang paglapta sang virus.

“Kita makipag-angot sa mga natungdan nga ahensya para sa mga masunod nga tikang nga aton paga-obrahon. Magapagwa man kita kang sangka Executive Order para sa guidelines para sa dya nga hitabo kag aton hangyu-on nga kita mapa-idalom sa State of Calamity tungod sa ASF. Amon man tinghuwa-an mabuligan ang mga tag-iya kang mga baboy nga naapektuhan kang dya nga sakit,” suno sa Facebook post ni Hamtic Mayor Julius Ronald Pacificador.

Ginpahayag ni Cadiao nga nagpatuman na sang border control ang mga tagsa ka mga banwa agud mastriktuhan ang pagpaguwa kag pagpasulod sang baboy.

Una na nga gin-report nga linibo na ka mga baboy ang nagkalamatay sa Hamtic. Ginakahangaw-an nga maapektuhan ang swine industry sa probinsiya kun maglapta pa ang virus.

Antes sini, ang Antique lang kuntani ang ASF-Free sa bug-os nga Western Visayas.