ILOILO — Isa si Carl Louis Balontong sa naka-survive sa naglugdang nga MV Trisha Kerstin 3 sa kadagatan sakop sang Barangay Baluk-Baluk, Pilas Island, Basilan sang Enero 26 sang kaagahon.
Residente sang Cabanbanan, Oton si Balontong kag naga-apprentice sa amo nga barko.
Base sa ulihi nga record sang Office of the Civil Defense-Bangsamoro Autonomous Region, 321 ang na-rescue kag nagapadayon pa ang operasyon.
Lakip sa 321 ka na-rescue si Balontong. –
Naglawig sang tatlo tubtob apat ka oras nga naglangoy-langoy si Balontong.
Suno kay Evelyn Balontong, iloy ni sang naka-survive nga si Carl, mga las-6 kahapon sang aga nagtawag ang personnel sang Aleson Shipping Lines nga nagapanag-iya sang naglugdang nga RoRo vessel kag sa diin man siya naga-apprentice, nga yara sa ospital sa Isabela ang iya bata kag yara na sa maayo nga kahimtangan.
Las-8 sang aga sang matawag kuntani liwat si Evelyn sa kompaniya, nagtawag ang iya bata nga ginpasalig nga luwas na siya sa peligro.
Sa panaysayon sang naka-survive nga si Carl Louis, mga las-2 sang kaagahon nabatyagan niya nga may nagatulo amo nga nagbugtaw siya.
Ginkuha ni Carl Louis ang iya mga papeles kag cellphone antes magguwa pero nabuy-an niya ang mga ini sang nakadanlog kag nahulog sa idalom sa diin napahamtang ang mga salakyan nga karga sang barko.
Naglumpat sa tubig si Carl Louis nga wala sang life jacket tungod ginhatag niya sa ila Chief Engineer nga may edad na.
Nagdesisyon si Carl Louis nga maglumpat na lang tungod nagataas na ang tubig sa diin siya nahulog.
Mga las-5 sang kaagahon gin-rescue si Carl Louis upod ang anum pa, sang Bantay Dagat kag gindala sa ospital sa Isabela.
Nakaagum siya sang diutay nga pilas sa tiil kag nagareklamo sang pagpalanakit sang lawas tungod sa kadugayon sang iya paglangoy tubtob ma-rescue.
Nakaguwa na sa ospital si Carl Louis kag yara na sa opisina sang kompaniya sa diin siya naga-apprentice kag nagapanag-iya sang barko samtang ginahulat ang clearance nga mahimo na sila makapauli.
Si Carl Louis ang graduate sang Bachelor of Science in Marine Engineering sa Western Institute of Technology sang 2024.
Nagsugod ang iya apprenticeship sa Aleson Shipping Lines sang Mayo kag matapos kuntani sa pareho nga bulan subong nga tuig.
Paagi sa pagpanikasog sang iya ginikanan kag pagpaninguha bilang student assistant, natapos niya ang tatlo ka tuig nga kurso kag nagalaum nga makasakay sa barko bilang seaman sa tiun nga matapos ang iya apprenticeship. — Aksyon Marvin Malificiar/Aksyon Maria Kayla Tingzon
