Ginhatagan sang tubtob Hunyo 30 subong nga tuig ang mga individual traditional jeepney operators nga mag-operate kun indi pa maka-upod sa kooperatiba ukon korporasyon.
Base sa Memorandum Circular number 2023-013 nga gin-issue ni Land Transportation Franchising and Regulatory Board ukon LTFRB secretary Teofilo Guadiz III, ginpalawig sang tatlo ka bulan ang franchise sang mga individual traditional jeepneys halin sa original deadline nga Marso.
Pagkatapos sang Hunyo 30, ang mga individual operators lang nga na-consolidate ang ila units ang pasugtan nga i-extend ang ila provisional authority sang tubtob sa Disyembre 31 subong nga tuig.
Ang kooperatiba naman sa diin nag-upod ang individual operator ang maga-file sang amended application para sa franchise consolidation tubtob sa Hunyo 30 nga nagalakip sa bag-o nga miyembro.
Dugang pa sang LTFRB may tubtob Oktubre 31 ang mga bag-o nga transport cooperatives kag corporations para mag-file sang application para sa franchise consolidation para sa extension sang ila provisional authority.
