Ginsaysay ni Irene Requela Torres nga nakabugtaw siya mga las-6:30 sang aga sang Oktubre 7 tungod naghuni ang siren ukon ang warning nga may posible magtupa nga missile sa lugar.
Tungod sang kakulba, gilayon nga ginkadtuan ni Torres ang iya employer agud nga ipasulod sa safe room sang balay. Segundos lang ang nagligad sang may naglupok nga bomba.
Ginpahayag niya nga nagguwa ang iya ama sa safe room agud magkadto sa CR gani gin-updan niya pero samtang nagahulat siya sa guwa sang CR, naglingling siya sa bintana sang balay kag nakita ang armado nga mga lalaki nga nagasakay sa motorsiklo.
Nagdumdom pa si Torres nga mga miyembro sang Israel Defense Forces (IDF) ang mga lalaki tungod may military camp malapit sa ila balay pero nakibot na lang siya sang gulpi lang sila ginpalukpan.
Dali-dali naman nga gintawag ni Torres ang iya ama nga yara pa sa sulod sang CR tungod may mga tawo na sa guwa sang ila balay nga nagasinggit pero indi pamilyar sa iya kun ano nga lenggwahe, kag nagapamilit nga magsulod.
Madasig nga nagdalagan si Torres sa safe room kag wala anay ginsiraduhan ang puwertahan tungod wala pa nakasulod ang iya nga ama.
Pero tungod indi niya mabatas nga bayaan ang iya nga ama, liwat nga nagguwa ang Pinay agud tabangan ang iya employer nga makaguwa sa banyo kag makasulod man sa safe room.
Ginpabutyag niya nga samtang yara sila sa sulod sang safe room, nabatian sila sang armado nga kalalakihan rason nga ginpalukpan pa gid sila sang pusil sa sulod sang balay.
Mga lima ka armado nga lalaki suno sa iya nga ginapatihan miyembro sang Hamas ang nakita niya nga nakasulod sa balay nga iya gina-obrahan.
Suno sa iya, indi basta-basta nga makasulod ang kalalakihan sa safe room bisan puwersahon nila ini tungod tuman ini ka secured.
Pagkagab-i, may ginhimo nga rescue operation ang IDF pero wala sila nakahibalo sang iya nga ama tungod low battery na ang ila nga mga cellphones.
Pagkasunod nga adlaw, ginpangitaan ni Irene sang paagi agud makuha ang laptop sang iya amo para maka-charge sang iya cellphone kag makapangayo sang bulig.
Pagkatapos sang 35 ka oras nga pagpanago sa safe room, na-rescue si Torres kag ang iya nga employer.
Nakita man niya nga madamo sang bangkay sa karsada kag mga pilason nga mga soldado sang IDF. Ginhatagan si Torres sang bulong sang doctor sa Israel kag nagapaidalum sa psychological counseling agud makabulig sa trauma nga iya gin-agyan.
