ILOILO CITY — Napaso ang lawas sang 33-anyos nga babaye sang ginsabyahan sang asido samtang nagalakat siya sa dalan sa Brgy. San Rafael, Mandurriao sang Hunyo 23 sang kaagahon.
Suno kay Police Captain Val Cambel, officer-in-charge sang Iloilo City Police Station 10 sa Mandurriao, nagalakat ang babaye upod ang lalaki nga katrabaho niya sang natabo ang insidente.
Base sa kuha sang CCTV camera, nagalakat si alyas Mae halin sa Boardwalk malapit sa Iloilo River Esplanade kag pag-abot malapit sa Medicus Medical Center, may nagpalapit sa iya nga lalaki nga nagasuksok sang raincoat kag helmet. Nagalakat man ang suspetsado.
Ginapatihan nga asido ang ginsabya sang lalaki kay Mae. Nagapaayo na sa ospital ang babaye.
Nagresponder ang mga personnel sang Police Station 10 sang nakabaton sang tawag halin sa Iloilo City Police Station 6 tungod didto una nga nagtawag ang security guard sang ospital.
Ginpahayag ni Cambel nga may person of interest na sila sa nagsabya sang asido kay Mae.
Limitado ang impormasyon sang police sa natabo tungod indi pa ma-istorya ang babaye nga yara pa sa ospital. — Aksyon Paula Elambayo
