Pagpangimon ang ginalantaw nga rason sa kamatayon sang mag-asawa nga nasapwan patay sa sulod sang ila balay sa Brgy. Binolosan Grande, Calinog kaina sang kaagahon.
Ang mag-asawa amo kanday Alyas Bong, 52-anyos kag alyas Len, 47-anyos.
Suno kay PMaj. Myles Dieron, hepe sang Calinog Municipal Police Station, wala sang iban nga suspek ang pamilya sa kamatayon sang mag-asawa.
Base sa imbestigasyon sang kapulisan, wala sang forced entry sa balay sang mag-asawa. Wala man sila sang malain nga record sa barangay ukon may nakontra ang mag-asawa.
Sa pagpangusisa sang kapulisan sa kabataan sang mag-asawa, makapila ka beses na nga nadakpan nga may ka-chat sa Facebook ang iloy nga masami ginahalinan sang away sang ila ginikanan.
Daku ang posibilidad, suno kay Dieron, nga si Bong ang nagpatay sa iya asawa paagi sa paglampos sang tubo, kag naghikog pagkatapos sang krimen. May na-recover nga tubo ang kapulisan sa sulod sang kuwarto sang mag-asawa.
Patal nga pilas sa ulo tuga sang pagpanglampos sang tubo ang naagum ni Len, samtang lima naman ka pilas sa lawas lakip ang tag-duha sa tiyan kag dughan, kag isa ka liug ang naagum ni Bong.
Ipaidalom naman sa psychological counseling ang mga bata sang duha, dugang ni Dieron.
Padayon man ang imbestigasyon sang kapulisan sa natabo. — Aksyon Paula Elambayo
