Nasapwan nga patay na sa iya ginasakyan nga angkar-angkar ang 48-anyos nga amay sa Barangay Alaguisoc, Jordan, Guimaras pasado las-6 subong nga aga.
Suno kay Police Captain Maria Jona Casono, hepe sang Jordan Police Station, suspek sa pagpatay ang 26 anyos nga anak nga lalaki sang biktima.
Base sa imbestigasyon sang police, nasugata sang anak ang iya amay nga nagamaneho sang angkar-angkar nga may karga nga uling. Halin ang suspek sa ginlawigan sang iya karabaw.
Wala na sang istorya nga natabo suno kay Captain Casona kag gilayon nga ginlabo sang anak ang iya amay. May pilas sa liug ang amay.
Suno sa police, gin-ako sang anak nga halin sang gamay pa sila makita na nila nga ginasakit sang ila amay ang ila iloy rason nga nagtanom na siya sang kaugot.
Wala na naga-upod sa isa ka balay ang biktima kag ang suspek suno kay Casona.
Apang sang nagligad nga semana, nagkadto sa iya asawa ang biktima kag nagpangayo sang kuwarta kag ginsakit pa ang babaye.
Preso na sa Jordan Police Station ang anak.
Ginahulat pa ang desisyon sang pamilya sang napatay kun mapasaka sang kaso. — via Aksyon Angel Mae Ciudad
