ILOILO– Patal nga pilas sa tiyan ang ginkapatay sang 19-anyos nga estudyante sang ginbuno sang mangunguma sa Brgy. Manasa, Alimodian sang Hunyo 9.
Ginkilala ang biktima kay Lester, residente sang Brgy. Cabunga-an, Leon, samtang ang suspek ginkilala sang police kay Loberto, mangunguma kag residente sang Brgy. Cabacanan Rizal, Alimodian.
Suno kay Police Captain Chrysler John Ledesma, hepe sang Alimodian Municipal Police Station, naga-inum inom ang biktima upod ang iya mga abyan sa guwa sang tyangge antes natabo ang insidente.
Ginpahayag sang police nga nakainom na ang suspek sang nagpungko sa pihak nga lamesa sa tupad sang grupo sang biktima.
Sa imbestigasyon pa sang police, ginhagad sang grupo sang biktima ang suspek nga magtagay pero namahog nga mamuno kun tandugon siya. Hinali lang nagtindog ang suspek, ginhunos ang dala niya nga kutsilyo kag ginbuno ang biktima.
Nagtambag pa ang grupo sang biktima kag ginhaboy sang mga pulungkuan ang suspek gani nga natumba.
Sang natumba na ang suspek, ginbuligan sang iya mga upod ang biktima kag gindala sa Aleosan District Hospital pero las-2:30 sang kaagahon, Hunyo 10, gindeklarar siya nga napatay.
Napasakaan na sang kaso nga homicide ang suspek. — via Aksyon Paula Elambayo
