Bana pilason sang ginlabo sang iya asawa sa Miagao; asawa una nga gilampusan sang sanga sang kahoy sang iya bana

ILOILO– Duha ang pilas sa tiil sang bana, samtang isa sa butkon, sang ginlabo siya sang makatatlo ka beses sang iya asawa sa Barangay Kirayan Tacas, Miagao mga las-6 kaina sang aga.

Suno kay Police Major Richard Lao, hepe sang Miagao Municipal Police Station, papuli sa ila balay ang asawa nga si alyas Sita, 62-anyos sang ginlambatan sang iya bana nga si Boy, 68-anyos kag ginlampusan sang sanga sang ipil-ipil.

Tungod sini, nagbato ang asawa — ginhunos niya ang ginataklos nga binangon sang iya bana kag ginlabo.

Pagpangimon ang motibo sa krimen.

Madugay na nga wala naga-upod ang mag-asawa tungod imunan ang bana kag ginasakit ang iya asawa.

Nagapauli lang ang asawa sa ila balay sa pagtatap sa ila apat ka mga bata pero naga-stay in siya sa iya ama.

Preso sa Miagao Municipal Police Station ang asawa samtang estable na ang kondisyon sang bana sa ospital. — Aksyon Maria Kayla Tingzon