ILOILO CITY –Apat ang kumpirmado nga napatay sa pagpangbuno sa San Isidro, La Paz, pasado las-10 kagab-i.
Ginkilala ang mga napatay kanday Johnny Provido, 67-anyos; iya mga bata nga kanday Johnny Jr., 42-anyos kag Joven 46-anyos.
Ginkumpirmar man sang pamilya Muya nga napatay si Tyrone Muya, 33-anyos.
Napilasan naman ang mga utod ni Tyrone nga kanday Glenmark, 44-anyos kag Gilbert 36-anyos nga estable na sa ospital.
Suno kay Virginia nga iloy sang mag-utod nga Provido, naka-inom ang iya bata nga si Johnny Jr., sang nabati-an nga naghambal nga kadtuan niya si Tami, utod sang napatay nga si Tyrone tungod wala gihapon mahatag sa iya ang shabu bisan nabayran na.
Makatatlo ka beses nagbalik-balik si Johnny Jr. sa balay sang mga Muya sa pagpangita kanday Tami kag iya live-in partner nga si Badoy pero wala sila.
Ginpabutyag man sang iloy sang mga Muya nga wala nagatiner sa ila balay kanday Tami kag Badoy.
Wala sang ideya ang iloy sang mga Muya kon nagabaligya sang illegal nga druga si Tami.
Suno sa iya, duha sa pamilya Muya ang gindala sa ospital nga lunsay kritikal ang kondisyon.
Suno sa duha ka pamilya kag mga residente, may nagluntad nga komosyon sa atubang sang balay sang mga Muya tubtob natabo ang pagpangbuno.
Indi man nila matumod kon sin-o ang nagsugod sang pagpangbuno tungod sa kadasigon sang mga hitabu pero ang duha ka mga kutsilyo nga na-recover ang nakita nga dala sang mag-utod nga Provido.
Nagapadayon ang imbestigasyon sang kapulisan agud maplastar ang natabo kag motibo sa krimen. — Aksyon Angel Mae Ciudad
