ILOILO — May igo sang pagkatiro sa lawas ang lalaki sang nasapwan sa Sitio Caban-Caban, Brgy. Bariga, Banate kahapon sang hapon, Hulyo 22.
Ginkilala ang biktima kay Benjie Misterio, ginabanta sa 40-anyos ang edad kag residente sang Brgy. Rumagayray, San Enrique.
Suno kay Police Captain Randy Lambungan, hepe sang Banate Municipal Police Station, may nakabais nga duha ka lalaki sa lugar ang biktima antes nabatian ang asud-asod nga lupok.
Ginahibalo pa sang police kon paano nakalab-ut sa lugar ang biktima.
Sa pagpangusisa sang police, nakaagi na nadakpan sa buy bust operation sa San Enrique ang biktima sang 2017 kag nakaguwa sang 2020 paagi sa plea bargaining agreement.
May pilas sang pagkatiro sa dughan, ulo, wala nga kamot kag sa abaga ang biktima suno kay Lambungan.
Padayon nga gina-imbestigaran sang kapulisan ang natabo.
Nabukid nga porsyon sang Banate ang Brgy. Bariga suno sa police. — Aksyon Paula Elambayo/ARI trainee reporter Decyrrie Diamante
