ILOILO CITY — Nakita-an ang bangkay sang pulis nga nagalutaw sa Iloilo River sakop sang Brgy. San Rafael, Mandurriao (likod sang boardwalk) kaina sang aga.
Ginkumpirmar ni Police Captain Val Cambel, hepe sang Police Station 10 sa Mandurriao nga ginkilala ang pulis kay Patrolman Dande Luis Tayhon, 28-anyos, tumandok sang Negros Oriental kag assigned sa Regional Communications and Electronics Unit 6 base sa nakuha nga ID sa iya suksok nga cargo pants.
Wala sang may nakita nga pilas ukon lagub sa bangkay. Sa pagkahibalo ni Police Major Lailyn Sencil, spokesperson sang Police Regional Office 6, Biyernes sang hapon ulihi nga naka-istorya ni Tayhon ang deputy sang RCEU tungod mapauli siya sa iya pamilya sa Negros Oriental.
Ipa-autopsy ang pulis agud mahibaluan ang rason sang iya kamatayon. — Aksyon Farrah Mae Morano/Maria Kayla Tingzon
