ILOILO — Temporaryo nga gin-hold sang Department of Public Works and Highways (DPWH) 6 ang bidding sang ikaduha nga phase sang rectification works sang Ungka Flyover.
Suno kay DPWH 6 OIC, Engr. Sanny Boy Oropel, indi pa mahimo nga makasugod sang bidding tungod ginahulat pa nila ang final result sang seismic test sa soil classification pagkatapos sang intense jet grouting sa 13 ka mga haligi.
Nagpa-athag naman si Oropel nga kinahanglan sundon ang proseso agud nga wala na sang magtuhaw nga problema pagkatapos sang rectification works.
Una na nga ginpahayag ni Engr. Oropel nga natalana kun tani buksan ang bidding sa second phase antes matapos ang Abril. Kabahin sang ikaduha nga phase ang pagkakas sang mga salog sa ikaapat, ikalima kag ikaanum nga haligi sang flyover kag posible pag-ilis sang desinyo.
Yara na sa 47% ang completion rate sang intense jet grouting sa 13 ka mga haligi.
Ginpasalig naman ni Oropel nga magapadayon ang iya hugot nga supervision sa nagapadayon nga pagkay-o sa Ungka Flyover. — via Aksyon Cedrick Anona
