ILOILO CITY — Gin-ako ni alyas Lupin, 44-anyos sang Sta. Filomena, Arevalo, nga subject sa drug buy bust kagab-i nga siya ang nakit-an sa CCTV footage nga nagransak sa JASAC Drug Store sa amo man nga barangay sang Mayo 6 sang aga.
Suno kay PCapt. Benjie Dicen, OIC sang Arevalo Police, base sa CCTV footage nagasanto ang physical appearance ni Lupin sa nagsulod sa botika.
Ginpabutyag sang mga residente nga kilala nga masabad kag may pila man ka record sang pagpangawat si Lupin sa ila lugar.
Suno kay Dicen, napreso sang 2009 si Lupin sa kaso nga possession of illegal firearms kag nakaguwa sang 2010. Napreso man siya sang 2014 sang nadakpan sa drug buy bust kag nakaguwa sang 2020.
Base sa pag-ako ni Lupin, indi ang drug store ang iya plano nga kawatan kundi ang motorsiklo nga naka-park sa kilid sang simbahan.
Naguyod na ni Lupin ang motorsiklo sang gintaghol siya sang ido rason nga nagdalagan tubtob nakalab-ut sa drug store.
Pag-abot sa drug store, gin-ako ni Lupin nga gin-ideyahan niya nga sudlon ang botika.
Nadakpan si Lupin sa drug buy bust sang Mayo 7 sang gab-i kag nakuhaan sang P170,000 nga balor sang suspected shabu kag granada. — via Aksyon Marvin Malificiar
