ILOILO — Patay ang construction worker sang ginbuno sang iya upod sa trabaho sa Brgy. San Julian, Janiuay kahapon, Agosto 15.
Ginkilala ang biktima kay alyas Verly sang Brgy. Calaparan, Arevalo kag suspek si alyas Agustin, 27-anyos, residente sang Brgy. Cabatuanan, Basay, Negros Oriental.
Suno kay Police Captain Hector Ayagan, officer-in-charge sang Janiuay Municipal Police Station, kahulugbon ang motibo sa pagpangbuno.
Sa imbestigasyon sang police, naga-inom-inom ang suspek kag biktima tubtob nga may natabo nga pagbinaisay.
Tungod sini ginbuno sang suspek ang biktima.
Pilas sa wala nga parte sang dughan ang gintunaan sang iya kamatayon sang biktima.
Nadakpan ang suspek sa ila barracks nga yara na sa custodial facility sang Janiuay Municipal Police Station.
Magapangatubang sang kaso nga homicide ang suspek. — ARI Trainee reporter Robert Nietes
